Бузилган мантиқ Кеча "Чорвоққа элтувчи давлат қурган йўлнинг пулли йўлга айланиши пулли йўл моҳиятига зид" дея анча юмшоқ муносабат билдирган эканман. Йўқ, буларнинг нияти анча жиддий. . Йўл вазирининг баёноти билан танишгач, буларнинг давлат қурган йўлни пулли йўлга айлантириш хоҳиши моҳиятга эмас, мантиққа ҳам зидлигини айтиш мумкин. Булар хато қилаяпмиз деб ўйлашмаяпти. Эмишки, Чорвоққа элтадиган муқобил йўл бор ва шунингчун Бектемирдан Чорвоққа борувчи йўлнинг бир қисмини пулли йўлга айлантириш мумкин. Жаноб вазир эҳтимолки, Қибрай, Чирчиқ ва Ғазалкент шаҳарлари ичидан ўтадиган йўл борлигини айтмоқда. Бу жудаям ажойиб. Биласизми, агар жаноб Жамшид Турсуновнинг мантиғига суянилса, Тошкент — Самарқанд йўлиниям (М39 трассасини) пулли қилиш мумкин. Чунки масалан, Самарқандга бориш учун Тўйтепа, Бўка, Гулистон, Янгиер, Зарбдор қилиб ҳам айланиб чиқиб кетиш мумкин. Бемалол, айтайлик, М39 трассасининг Тошкентдан Жиззахгача қисмини пулли қилиб қўйиш мумкин. Ёки бўлмасам, Андижон — Тошкент (А 373) йўлининг Қўқонгача қисминиям пулли деб эълон қилиш мумкин. Ахир Бекобод ва Хўжанддан ўтиб бориш мумкин-ку. Тўхтанглар, бу абсурд дейишингиз мумкин. Лекин жаноб вазир бизга мана шу қип-қизил абсурдни таклиф этмоқда. Бу абсурдни, бузилган мантиқни йўл сотиш, деб атасак тўғрироқ бўларди. Чайиб сотадиган актив қолмай, энди йўл сотишга ўтиш бошланади, шекилли. Айтиш керакки, Пуллик йўллар тўғрисидаги қонунни параламентнинг янги таркиби қабул қилади. Тепадан тезис-топшириқ тушмагунча, оғиз очмайдиган, сайлов-паловда аранжировка шовқин солаётган партиялар нима деркин?