​"Водий питак" Ҳукумат қарори билан янги ном берилган аэропорт, автовокзаллар ва автостанцияларнинг рўйхати тасдиқланипти. Хусусан, Қўйлиқдан водий шаҳар ва туманларига автомобиллар қатнайдиган автостанция расмий номи "Водий йўли" бўлипти (амалдаги номи Бобуршох экан). Халқимиз Қўйлиқдаги мазкур машҳур масканни ҳеч қачон Бобуршох деб атамаган. "Водий йўли" деб ҳам атамайди. "Водий питак" дейди. Ҳатто навигация картаси ва агрегаторларга ҳам "Водий питак" бўлиб кирган. Питак сўзи соф ўзбекча, биз ишлатаяпмиз, оталаримиз ишлатган, боболаримиз ишлатган, русча "пятак" билан алоқасини йўқотиб бўлган. Toshkent-Humo'га айланган янги аэропорт ҳақида нима дейиш мумкин. Humo тўлов тизими, авиакомпания, ҳоккей саройи, ҳоккей клуби ва яна ўнлаб шу номдаги компаниялар, отеллар, уй-жой комплекслари ёнига энди аэропорт номиям қўшилди. Айтайлик, оригиналроқ номалаш ҳам мумкин эди, айтайлик, биринчи ўзбек учувчиси номи билан ёки аэропорт жойлашган тарихий макон номи билан. Ўзининг ҳозирги Тошкент-Шарқий номиям аллақачон қабул қилиб бўлинган. Энди янгисига кўникамиз.