Энерготарифларни ошириш эмас, Saneg’га совға қилинган конлар, улушлар ва активларни қайтариш масаласи кун тартибида бўлиши керак Кечаги анжуманда 2019 йилда 100 дан ортиқ конлар ҳукуматнинг ёпиқ қарори билан «Ўзбекнефтгаз»дан Jizzakh Petroleum/ Sanoat Energetika Guruhi /Saneg бошқарувига ўтказилгани ва уларнинг кейинги тақдири масаласи ҳам кўтарилган. Шукрки, 40 йил ўтмади. Энергоқинғир ишларнинг энергоқийиғи 7 йил ўтиб бўлсаям, қайта кўтарилмоқда. 2019 йил декабрдаги ёпиқ қарор билан Saneg'га совға қилинган (102та нефть ва 6та газ кони) конларнинг дебети атайин 40%га кам қилиб кўрсатилган, кейинги йиллардаги ўсиш прогнози эса амалда мавжуд кўрсаткичлар этиб қайд этилган (охирги йилларда сўриб бўлинган конларда қазиб олиш мисли кўрилмаган даражада пасайган). Яъни конларни совға қилиш учун важ ясашда (дебетини паст кўрсатиб) очиқчасига сохтакорлик қилинган. Миллиардлаб инвестиция киритиш, янги қудуқларни бурғулаш ва капитал таъмирлаш мажбуриятлари конларни ҳадя қилиш учун қоғозда яна бир оқлов иллюзиясини ясаган (махсус комиссия балки аниқлар ўзи қанча инвестиция киритилганини, нечта қудуқ бурғуланиб, нечтаси таъмирланганини). Фақат конлар билан шундай бўлганми? Йўқ, албатта, иштаҳа энергошериклар от устидалигида келган. Айтайлик, ёпиқ қарор билан "Фарғона нефтни қайта ишлаш заводи"ни танлов ўтказмасдан "ишончли бошқарувга бериш" ва кейинчалик "хусусийлаштириш" схемаси алоҳида китоб бўлади. Охирги 7-8 йил ичида Jizzakh Petroleum/ Sanoat Energetika Guruhi /Saneg назоратига ўтиб қолган қайси активни ё улушни олиб, ичига қарасангиз, Ўзбекнефтегаз ё Ўзтрансгаздан хатлаб олинган бўлиб чиқади. Ўзбекнефтегазнинг Шўртангаз-2'даги 100% улуши ArkChemical'да 40% улушга айланиб қолгани борасида эса уч мавсумли сериал олса бўлади. Шунинг учун ҳурматли энергожанобларимиз ва уларнинг хорижлик кунда-шунда маслаҳатгўйлари ёпиқ эшиклар ортида тарифларни ошириш масаласини эмас, ўзбекистонликларга тегишли энергоактивларни эгасига қайтариш масаласини муҳокама қилишлари керак аслида. Энерготарифларнинг адолатлилиги ва самарадорлиги калити ҳам ўзи шу ерда.