Ишончли бўлмаган ҳамкор Икки ой аввал Ўзавтомоторсга Captiva учун тўлов қилган фуқароларга автомобиль етказиб берилмаслиги маълум қилинган. Бу ҳақда Қурбанов юз бераётган воқелик бўйича бор тафсилотларни мижоз номидан очиқламоқда. Айтиш керакки, монополист Ўзавтомоторснинг мижоз олдидаги мажбуриятларини бажармаслиги ёки лозим даражада бажармаслиги биринчи марта эмас. Бу доимий ва сурункали. Бунга улар жамиятни, танлови йўқ харидорларни кўндириб бўлди. Ҳукуматнинг Ўзавтомоторсга нисбатан арзанда ўлароқ муносабати, тийиб турувчи ролини ўташи керак бўлган Монополияга қарши кураш қўмитасининг феълан тугатилганлиги монополистнинг ҳаммага тупуриб қўйишнинг янги ва янги усулларини қўллашда давом этишга рағбатлантирмаслиги мумкин эмас. Ўзавтомоторс 2019 йил октябрдан буён 3 фоизлик йиғимни харидорлардан олган ҳолда, бюджетга тўламай келган. Ўтган даврда тўловлар амалга ошира бошланди деган хабарни ўқиганимиз йўқ. Бюджетга тўланмаган сумма 2 йил давомида, билмадим, неча триллион сўмга етган экан. Жамият, унинг инъикоси бўлиши керак бўлган Парламент индамайгани буни ҳазм қилди. Ҳукумат сўровга чақирилмади. Ўзавтомоторс қутурмай ким қутурсин? Ўзавтомоторс 2 йилдан буён импорт божларини тўламасдан, автомашина импорти билан, яъни чайқовчилик билан шуғулланиб келмоқда. Чайқовчилик ҳуқуқини унга Ҳукуматнинг ўзи берган. Яширин, махфий қарор билан. Жамият оз-моз дод-вой солди, сайланган саноқли депутатлар жавоб сўради. Якунда ёпиғлиқ қозон ёпиқлигича қолди. Шундан кейинам Ўзавтомоторс қутурмай, ким қутурсин? Одатда, қоида тариқасида, бу махинага кучи етмаслигини билса, бошқа давлат органлари, регуляторлар ҳеч қурса харидорларни рискли ҳаракатлардан огоҳлантириши керак. Масалан, ташқи миграция билан шуғулланадиган агентлик ўз мажбуриятларини бажармаса ёки мижозларини алдаса, лицензияси олиб қўйилади, фаолияти тўхтатилади. Масалан, микрокредит ташкилоти ё ломбард қарздорлар ҳақларини бузишни бошласа, регулятор ҳақлари бузилган қарздорлар томонда бўлади. Вҳк. Афсуски, монополият Ўзавтомоторсга нисбатан регулятор мавжуд эмас. Шунинг учун , биз - пешонасига шу ҳукумат ва шу Ўзавтомоторс битганлар ўзимизни ўзимиз огоҳлантиришимиз керак бўлади: Ўзавтомоторс - Ишончли бўлмаган ҳамкор. Ундан эҳтиёт бўлинг!