Россиядан сотиб олинадиган газ нархлари очиқланиши керак Вазир Мирзамаҳмудовга кўра, Ўзбекистон Россияга газ учун қанча тўлаши очиқланмайди, лекин нархни белгилашда миллий манфаатлардан келиб чиқилган. Биринчи қисми иккинчисига ўзаро мантиқан қовушмаган бу баёнотга қарамай, газ нархи очиқланиши керак. Биринчидан, газни қанақадир хусусий компания эмас, давлат назоратидаги Uzgaztrade АЖ сотиб олмоқда. Uzgaztrade АЖ сотиб олаетган газ тўлови бюджет ҳисобидан субсидияланади. 2023 йилда бунинг учун 14,2 трлн.сўм мўлжалланган эди, Россия билан шартномадан кейин бу рақам каррасига ортиши аниқ. Демакки, тўловчи Ўзбекистон халқи ҳисобланади. Наҳотки тўловчи унинг чўнтагидан қанча тўлов амалга оширилишини билишга ҳақли бўлмаса? Шахсан мен менинг ҳисобимдан қанчадан газ сотиб олинаетганини билишни истайман, бу менинг ҳаққим. Иккинчидан, вазирнинг ўзи аввалроқ ишора қилганидек тарифларни бозор нархларига яқинлаштириш юз бергудек бўлса, ҳеч бўлмаганда ҳисоб-китоб учун бу нархлар керак бўлади. Ахир газ 250 доллардан олинадиган бўлса, тарифлар базаси 200 доллардан бошланмайдику. Учинчидан, биз нормал, эркин дунё мамлакатидан эмас, агрессор, халқаро ҳуқуққа тупуриб қўйган, газни ва умуман ҳар қандай битимни шантаж ва босим воситаси ўлароқ кўрадиган давлатдан газ сотиб олмоқчимиз. Эртага бошимизга нима орттириб олганимиз ё рискларни ва оқибатларни ҳисобгв олганимизни билиш учун ҳам нарх очиқланиши зарур. Тўртинчидан, энг катта газ бозори бўлган ва ўтган йили Россия шантажидан таъминотни диверсификация қилиб қутулган Европа омборхоналари бугунги кунга 80 фоизга тўлдириб бўлинган. Бу вақт учун аввалги йилларда омборхоналар ўртача 60 фоиз тўлдирилиб олинган. Қиш илиқ келиши бўйича дастлабки прогнозлар бор. Яъни октябрга бориб газнинг глобал бозордаги нархлари яна сезиларли пасаяди. Бу нархлар узоқ муддатли шартномалар формуласига ҳам таъсирини ўтказади. Шу жиҳатдан ҳам нархлар ва уларнинг формуласи очиқланиши ўринли бўлади.