​Совокка қайтиш: Антимонополия 80 бензинга нарх лимитини ҳам ўрнатган Кеча 80 бензин билан боғлиқ дефицитли вазиятга тўхталиб, таклиф кам, талаб ўсиб бораётган шароитда биржадаги лотлар ҳажми максимумини 5 тоннадан 10 тоннагача кўтарилишини ғалати, деб атагандик. Spot нашри билан суҳбатлашган брокерлар нафақат лотлар ҳажмига, балки нархига ҳам лимит ўрнатганини тасдиқлашган. Демак, Рақобат қўмитаси томонидан АИ-80 учун нарх лимити 6,89 млн.сўм этиб белгиланган. Брокерлар лотни ютиш учун ундан ортиқ таклиф бера олмайдилар. Ростан ҳам кечаги биржа битимлари маҳаллий 80 бензин учун барча таклифларда 10 тонналик лот учун 6,89 млн.сўмдан ўтган. Брокерларга кўра, антимонополиянинг антиқа алгоритмидан кейин савдолар ким биринчи бўлиб кнопкани босишга улгурса ютадиган оддий лотореяга айланиб қолган. Натижада энди айрим омадли заправкалар ҳар куни бензин олиши, айримларига эса ҳафталаб бензин етмаслиги мумкин. Spot гаплашган брокерлар суткалик лимитни 4 тоннагача туширишни ва ҳафталик 8 тонналик лимит жорий этишни таклиф этишган. Бизнингча, таклиф чеклангани, монополистик занжир мавжудлиги, талабнинг ошиб бораётгани шароитида бу ҳам етарли бўлмайди. Акцизнинг ноллаштирилиши тўлиқ бекор қилиниши ёки бўлмасам, тадбиркорлик субъектлари томонидан якуний истеъмолчиларга 6000 сўмдан қиммат сотилаётган АИ-80 русумли автобензин маҳсулоти учун акциз солиғи тикланиши керак. Яъни, акциз имтиёзидан фойдаланмоқчимисан, марҳамат, 80 бензинни 6000 сўмдан арзон сот, қиммат сотмоқчимисан, бемалол, лекин фақат акцизни тўлаб қўй!