Тақиқлар иш бермайди, лекин спекулятив даромадлар солиққа тортилиши зарур Тармоқда ўнта автомобилга шартнома олган шахсга оид маълумотлар айлана бошлагач, кўпчилик турли кўринишда тақиқларни жорий қилиш таклифларини беришга киришиб кетди. ЖШШИРга қараб бир инсонга 1 йилда 1 та автомобил сотишни йўлга қўйиш, сотиб олинган автони расмийлаштирганидан сўнг 1 йил ичида сотилишини тақиқлаш, шартнома қилинган автомобиллар учун олдиндан тўловни 100 фоизга кўтариш, автокредитларни тақиқлаш шулар жумласидан. Олиб-сотарлик ва спекуляцияга қарши чоралар албатта зарурлигини қайд этган ҳолда, биз ҳуқуқий давлат ва бозор иқтисодиёти қурмоқчи эканимизни эслатиб ўтиш жоиз бўлади. Пул маблағларини ва мулк ҳуқуқини қандай тасарруф этишга тақиқ бу бозорга қарши тақиқ, иқтисодиётга қарши тақиқ. Унинг фойдасидан зиёни доим кўпроқ бўлади. Биз 2008-2016 йилларда ўтдикку шу йўлдан. Натижа бердими? Шунинг учун биринчи чора бож режимини юмшатишда давом этиш билан таклифни кўпайтириш бўлса, иккинчиси нархни эркинлаштириш бўлиши зарур. Дефицитли бозор ва UzAuto Motors прейскурант нархлари ўртасида шаклланган катта фарқ ҳисобга олиб нархларни юқорироқ фоизда ошириш ва монополист компания бундан буёғига яширин имтиёзлардан воз кечиб барча солиқ ва йиғимларни тўлашга ўтиши зарур. Ва учинчидан, спекулянтлар автомашина олди-сотдисидан олган даромадлари солиққа тортилиши зарур. Нима учун 1 йил ичида сотилган автомобиль бўйича автомобилнинг прейскурант нархи бўйича 12%лик даромад солиғи қўллаш мумкин эмас? Уй-жой 3 йил ичида сотилса фарқи солиққа тортиладику. Балки бюджет муҳокама этилаётган айни кунларда шу масалани кўтариш ва ўрганишни айни вақтидир?