Россия Марказий банки асосий ставкани бирдан икки фоиз бандига, 21%гача кўтарди Бунданда юқорироқ ставка 22 йил аввал, 2002 йилда қайд этилган эди. 2,5 йил аввал Россиялик агрессорлар Украинага бостириб кирганида ҳам ставка 20%гача кўтарилган эди. Россия Марказий банки ўз қарорини инфляцион омиллар кучайиб бораётгани билан изоҳлаган ва ставка янада оширилиши мумкинлигига ишора берган. Гарчи инфляция билан боғлиқ хатарлар мавжудлиги тўғри бўлсада, регуляторнинг бу тушунтириши унчалик етарли эмасга ўхшайди. Чунки инфляция ўсиш динамикасига эгалигига қарамай, бир хонали даражада, 8,4% атрофида қолмоқда ва йил якунлари бўйича кутилмалар 8,5% атрофида. Эҳтимолки, Марказий банкнинг бу қарори уруш билан боғлиқ навбатдаги эскалацияга нисбатан олдиндан қўйилган чеклов канали бўлиши мумкин. Ёғингарчилик мавсуми тугаши ва ер музлаши билан, иттифоқчилар Украинага ёрдамни сусайтираётган мураккаб шароитда Россия кенг фронт бўйлаб ҳужумга ўтиши ёки ундан даҳшатлироқ қадамни қўйиши, масалан, тактик ядро қуролини ишлатишга боришини истисно қилиб бўлмайди. Ставкани кескин кўтарилишига рубль курси деярли реакция кўрсатмаган. 1 АҚШ доллари 96,4 рубль, 1 юань 13,5 рубль атрофида қолмоқда.