​Камбағалликни қисқартириш тенгсизликнинг ортиши билан бирга содир бўлмоқда Газета Ижтимоий ҳимоя миллий агентлиги бўлим бошлиғи Дийдор Бердикличев, Жаҳон банки катта иқтисодчиси Икуко Уочи Ўзбекистонда камбағаллик билан боғлиқ тадқиқотларини эълон қилган. Эътиборли хулосалар: Шаҳарларда камбағаллик даражаси секинроқ пасаймоқда. Ҳозирда қишлоқ жойларда ва шаҳар жойларда камбағаллик даражаси деярли бирхиллашган. Камбағаллик даражаси мамлакат бўйлаб бир хил эмас — ҳудудлар ўртасида сезиларли фарқлар мавжуд. Энг кўп камбағал аҳоли Фарғона (350 минг киши), Қашқадарё (341 минг), Андижон (323 минг) ва Самарқанд (317 минг) вилоятларига тўғри келади. Улуш жиҳатдан Хоразм, Жиззах ва Сирдарёда. Тенгсизликнинг ўсиши камбағалликни камайтиришни ҳам секинлаштирган. Аҳолининг юқори 20 фоизининг йиллик даромадлари 33 фоизга ўган бўлса, қуйи 20 фоиз учун бу кўрсаткич 11 фоизни ташкил этган (4-расм). Бундай ўсиш бойлар ва камбағаллар ўртасидаги даромадлар фарқини кенгайтириб, Жини коеффициентини (тенгсизликнинг асосий ўлчови) 2022-йилдаги 31,2 дан 2023-йилда 34,5 гача оширган. Агар бу даврда тенгсизлик даражаси барқарор бўлганида, камбағаллик қўшимча 2,4 фоиз га камайиши мумкин бўлар эди. Оилаларни камбағалликдан олиб чиқишда даромадларнинг барча шакллари ичида меҳнат фаолиятидан топилган даромад энг катта аҳамият касб этган. 2022−2023 йилларда ўртача иш ҳақининг ошиши камбағалликни қисқартиришнинг асосий омили бўлган ва камбағаллик даражасининг 1,6 фоиз бандга пасайишига олиб келган