Ликвид улушлар Миллий инвестиция жамғармасига, ноликвидроғи Давактив ва Иқтисодиёт ва молия вазирлигига? Қарорга кўра, бир йил аввал Миллий инвестиция жамғармасига берилган Микрокредитбанк (40%) ва Бизнесни ривожлантириш банки (25%) улушлари Иқтисодиёт ва молия вазирлигига ўтказилади. Ҳар икки банк бир неча йилдан бери зарар кўриб ишлаб келмоқда ва давлат/бюджет берган капитални самарасиз ўзлаштириш ва банкнинг нархини арзонлаштиришдан бўлак натижа кўрсата олгани йўқ. Шунинг учун Миллий инвестиция жамғармаси бошқарувчилари портфелига ўтказилган мазкур банклардан воз кечганини тушуниш мумкин (бу банкларни энди банк мақомида эмас, бино ва иншоот сифатидагина сотиш мумкин). Худди шунингдек, энг истиқболли аэропортларини бирин-кетин яширин қарорлар билан ДХШга тортиқ этаётган «Uzbekistan Airports» АЖ (25%) ва бир неча муваффақиятсиз тажрибалардан кейин истиқболи савол остидаги «Ўзбекистон почтаси» АЖ (25%) улушларидан воз кечилган. Почтани Давактивга ўтказишганига қараганда, юмалоқ-ёстиқ қилиб "хусусийлаштириб" юборишса ҳайрон бўлмаслик лозим. Иқтисодиёт ва молия вазирлиги вазирлиги яна «Uzbekistan Airports» АЖ 100% акциядорига айланган, чўнтак ва дордан қочган инвесторлар билан «Uzbekistan Airports» АЖ аэропортлари ДХШ лойиҳалари тажрибалари давом эттирилса керак. Franklin Templeton'га ишончли бошқарувга берилган Миллий инвестиция жамғармаси зараркунанда ва истиқболсиз улушлар ўрнига жудаям жозибадор улушларни қўлга киритган. Бу хусусийлаштиришга жуда энг яқин турган, фойдаси ошаётган ва сифатли корпоратив бошқаруви шаклланаётган Ўзсаноатқурилишбанкнинг 30%и, энг катта суғурта компанияси Ўзбекинвестнинг 10%и (жами 30%га етган), юқори рентабелли компаниялар Ўзбекгидроэнерго АЖнинг 20%и (40% бўлади) ва Темирйўлинфратузилма АЖнинг 15%и (40% бўлади).