10та ҳокимга нисбатан хизмат текшируви очилган Пойтахт ҳокими Тошкент шаҳрининг 12 та туманидан 10 тасининг ҳокимларига нисбатан хизмат текшируви ўтказиш тўғрисида фармойиш қабул қилган. Фармойишга асос ўлароқ Коррупцияга қарши курашиш агентлигининг 22 июлдаги тақдимномаси келтирилган. Рўйхатга негадир кейинги кунларда шов-шувли ва резонансли воқеалар рўй бераётган Яккасарой (1, 2) ва шунингдек, чеккароқ Янгиҳаёт туманлари тушмай қолган. Газета'нинг ёзишича, хизмат текшируви туман ҳокимларининг қарор ва фармойишлари E-Qaror электрон тизимида эълон қилинаётганда улардан фойдаланиш имконияти асоссиз чекланган бўлиши мумкинлиги билан боғлиқ. Охирги ҳафталарда ОАВ ва тармоқларда зўбидин қурилиш компанияларининг ҳокимият органларидаги айрим маъмурий ваколатларга эга шериклари воситасида ер майдонларини эгаллаб олиш ва ноқонуний қурилишлари билан боғлиқ воқеалар кўп муҳокама бўлмоқда.