​Тарифлар очилди: улгуржи бозорга (кунлик савдоларга) қачон ўтамиз? Ҳукумат комиссияси биринчи марта нафақат генерация қилувчи станциялардан сотиб олинадиган электр энергияси, шунингдек, транспортировка (МЭТ) ва тақсимловчиларнинг (ҲЭТ) тарифларини ҳам очган. Аввал генерация субъектлари бўйича тарифларни узуқ-юлуқ кўринишда ва норасмий манбалардан олишга (1, 2) тўғри келарди. Демак, ИЭСлар бўйича энг арзон тариф ҳалиям амирликлар компаниясига сотилди дейилган Талимаржон ИЭСда (579 сўм), энг қиммати эса яширин қарор билан ишончли бошқарувга берилган Тошкент ИЭСда (1 126 сўм). Ўзбекгидроэнерго учун 522 сўмлик тариф ўрнатилган (ҳартугул, кескин ошириб берилмаган). Электр энергиясини магистрал ташиш учун (транспортировка) 98 сўмлик тариф белгиланган. Ягона харид қилувчи - электробассейн Ўзэнергосотиш'дан Энергосавдо учун сотув тарифи 704 сўмни ташкил этган. Энг қизиғи, ҲЭТнинг каррасига фарқланувчи тақсимлаш тарифлари билан боғлиқ (аввал бу тарифлар очилмаган). Энг қиммат тариф Қорақалпоқ ҲЭТ (401 сўм), энг арзон тариф эса Қашқадарё ҲЭТ (171 сўм) ўрнатилган. Aksa Enerji'га бошқарувга берилган Самарқанд ҲЭТ учун 278 сўмлик тариф берилган. Демак, бир қарашда ҳаммаси яхши. Истеъмолчилардан тортиб инвесторларгача ҳамма занжирлар бўйлаб тарифлар қандай шаклланаётганини кўришни бошламоқда. Лекин бу бошланиши холос. Биз аллақачон, яъни 2026 йил 1 январдан генерация учун кунбай савдолар орқали, яъни бозорда нарх белгилашга ўтишимиз керак эди. Ҳукумат комиссияси ваколати учун қолса, узатиш ва тақсимлаш тарифларини белгилаш қолиши зарур эди. Балки бозор томон бу қадам кечиккандир, лекин нега кечиккани бўйича ҳам, кейинги қадамлар тўғрисида ҳам недир ишоралар бериш лозимдир?