Навбатдаги 8 млрд.долларлик лойиҳа ясаётган инвесторнинг компаниялари ходимларига ойлаб маош тўламаслиги бу янги нормами? Enter Engineering, Eriell, Saneg, Самарқанд халқаро технология университети ишчи ва ходимлари бир неча ойлик маошларини ололмай, натижасиз шикоят қилишда давом этмоқда. Кипрликми, швейцарияликми ёки гонконглик инвесторнинг ўзаро аффилланган компанияларида маошнинг ойлаб кечикиши биринчи марта эмас, бу сурункали ҳолат. Қизиқ тарафи, ишчи ва ходимларига ойлик беролмаётган инвестор миллиардлаб долларлик янги ва янги лойиҳаларни таклиф этишни тўхтатгани йўқ. Ой бошида 8 млрд.долларлик ёнувчи сланец қазиб олиш лойиҳаси тақдим этилган бўлса, ўтган ойда Ёшлик 1 конида учинчи фабрикани тугатиб топширмай, тендер-пендерсиз тўртинчи ва бешинчи фабрикани (қиймати 12,5 млрд.долларга етган лойиҳа) бошлаб юборишганди. Орада Афғонистонда газ қазиб олиш бўйича 1 млрд.долларлик лойиҳага қўл уришди. Қарор қабул қилувчилар бу миллиард миллиард долларлик шиширилган лойиҳаларни амалга оширишга кипрликми, швейцарияликми ёки гонконглик инвесторда пул борми ўзи, лойиҳаларнинг иқтисодий самарадорлиги қанақа бўлади, деб ўйлаб ҳам ўтиришмайди. Балки бу миллиардларни сопи қаердан чиқариб берилишини жуда яхши тушунишади. Худди шундай нима учун ойлаб маош бермаяпсан деган савол кипрликми, швейцарияликми ёки гонконглик инвесторга ҳеч қачон берилмайди (худди Бойсун учун савол берилмагани сингари). Ваҳоланки, Меҳнат кодекси бўйича ойликни кечиктирганлик учун жавобгарлик бор. Маошни кечиктирган ёки бермаётганни жазолаш ва меҳнаткашларнинг ҳақларини тиклаш Меҳнат инспекциясининг тўғридан тўғри вазифаси. Дарвоқе, бугун Касаба уюшмалари куни. Нормал мамлакатларда касаба уюшмалари меҳнаткашнинг ҳақини туя қилаётган корчалон ва олигархларни обориб опкелади. Бизда бўлса шотир ва бессейн профсоюзлар бадал ушлашда бор, ишчилар ҳимоясига келганида маъмуриятнинг биқинига кирволади.