Автомобиллар импортида янги тақиқ ва чекловларга фантазия етмаяптими? 5 йилдан бери 80 шиптирни тақиқлай олмаётганимиз Ўзбекистонга олиб кирилаётган гибрид автомобилларни божхонада расмийлаштириш жараёнида “Евро-4” экологик тоифасидан кам бўлмаганлигини тасдиқловчи экологик сертификат талаб этиш бошланган. Абсурд шундаки, Ўзбекистонга Евро-4 тоифасидан паст бўлган экологик тоифадаги автомобиллар импорти 3 йил аввал тақиқланган. Европада 14 йил аввал, Хитойда 9 йил аввал Евро-4дан паст тоифадаги автомобилларни ишлаб чиқариш тўхтаган, яъни бундай мошинларни импорт қилиш жисмонан имконсиз. Янги товоннинг дубль абсурди ҳам бор: Ўзбекистонда Евро тоифасини аниқлайдиган ускунанинг ўзи йўқ, лекин 2 млн.сўмлик ўлпонни қуртдай санаб, тўлаш керак. Навбатдаги кулгули, мантиқсиз ва балки ғирт коррупцион ўлпон жорий этилишига сенаторларимиздан бири Анвар Тўйчиев жим қараб турмай, сенат сўровини киритган. На рақобатни, на нархни ва сифатни эплаётган мошин монополистлари ва уларнинг шотир малайлари, янги тақиқ ва чекловларга фантазиянгиз етмаётган бўлса, халқдан сўранг, зўрларини топиб беришади (Наполеон ҳақидаги латифада айтганидек, халқ аллақачон устингиздан кула бошлаган). Мана масалан: Мошин эни ва бўйига эгри солиқ (кичик мошинларга кўпроқ, камбағал ва ўртаҳолларни талаш учун); Балонли мошинларга қўшимча бож (Ангрен шина заводидан балон тақишсин); Рангбаранг қилиш дастури асосида машина ранги оқ ва қора машиналарга қўшимча 5-10% бож.