140 миллион долларни ким қайтаради? Фарғона нефтни қайта ишлаш заводини Ўзбекистон халқи ихтиёрига қайтарилгани, яъни қайта миллийлаштирилгани адолатнинг кичик тантанаси холос. Ва бу фақат бошланиши бўлиши керак. Афсуски, биз сохта схемалар билан эгаллаб олинган активлар, улушлар ва конларни қайтаришда камида 3 йилга кечикдик. Табиатнинг ўзи бизга 3 йил аввалги қишда етарлича ишоралар берганди, огоҳлантирганди, шонли энергетиклар ва уларнинг хўжаларининг башараларини очиб ташлаганди. Майли. Газета Давактивга заводга оид сўров юбориб жавоб ололмаган (давактивдагиларнинг аввалгилари ва янгилари ўртасида фарқ сезилаётгани йўқ ўзи). Лекин яна бир масала борки, буни алоҳида кўтармаса бўлмайди. Гап Фарғона нефтни қайта ишлаш заводи учун 100 миллион доллар тугул, аслида бир сўм ҳам тўланмаганидагина эмас (сопини ўзидан чиқариш схемалари ишлаган), гап заводнинг муҳим таркибий қисми 140 миллион долларга сотиб юборилганида (триллионлаб сўмлик списать қилинган ва сўйилган цехларни ҳисобга олмаганда ҳам). Бу пулларни ким қайтаради? Air Products ўзи кимнинг шериги бўлган, у билан тузилган схемалар текшириладими? GTL заводининг юрагини сотишдан, ФНҚИЗ муҳим таркибини сотишдан пуллар қаёққа кетган? Кимлар билан бўлишилган?