​Қирғизистонда ўртача маошлар Ўзбекистон кўрсаткичига етиб олган Ўтган ҳафта жанубий вилоятда туғилган дўстларимиздан бир ҳамқишлоқлари Қирғизистонга ишлаганини кетаётганини айтиб қолди. Водийда Қирғизистонга қўшни туманларда неча йиллардирки, Қирғизистонга ўтиб ишлаб келиш, айниқса баҳордан кузгача, одатий ҳолат ҳисобланади. Шунинг учун бу янгиликдек кўринмади (узоқ шимолга бориб, ҳар куни ўзини хавф-хатарга қўйиб, сарсон ва саргардон бўлгандан, жозибали таклифлар бўлмаса, ёнимизда қардош Қозоғистон ва Қирғизистонда ишлаган афзал ҳам). Демак, 2026 йил январь-май ойлари якуни билан Қирғизистонда ўртача ойлик маош 51 888 сомга ёки бизнинг пулга 7 090 минг сўмга етган. Ўзбекистонда 2026 йил январь-июнь ойларида ўртача маош 7 091,1 минг сўмга етганди. Яъни, қўшниларда ўртача маош Ўзбекистон кўрсаткичига етиб олган, қардошларда маошлар жуда юқори суръатда (+25,0%) ошаётгани ҳисобга олинса, июнь якунлари биланбиздан ўтиб ҳам кетилади (қўшиниларда ойлик статистика бир ой кечикиб очилади). Ҳудудлар миқёсида солиштирсак, пойтахт Бишкекда ўртача маошлар 64 294 сомга (8,8 млн.сўм), Иссиқкўлда 57 012 сомгача (7,8 млн.сўмга) кўтарилган. Бу кўрсаткичлар Ўзбекистондаги Тошкент ва Навоийдан ташқари барча бошқа ҳудудларимиздаги ўртача маошдан юқори. Хусусан, Қашқадарёдаги ўртача маош Бишкекдагидан 1,8 карра кам. Ҳа, баланд экан, лекин жуда ҳам жозибали эмас, дейишингиз мумкин. Шошманг. Қирғизистоннинг яна бир хусусияти, қўшниларда хусусий секторда маошлар ўртачадан каррасига баландроқ. Айтайлик, Таласда хусусий секторда ўртача маош 103 181 сомга ёки бизнинг пулга 14,1 млн.сўмга, Иссиқкўлда эса 96 252 сом, бизнинг пулга 13,2 млн.сўмга етган. Мана шу ҳудуд ва қатор секторларда ўзбекистонликлар учун каррасига юқори жозиба яралган. Энди савол: Шартли қашқадарёлик ватандошимиз уч карра юқори маош таклифи бўлса Иссиқкўл ва Таласга ишлагани нега бормаслиги керак?