UzAutoMotors молиявий натижалари ўзбек иқтисодиёти парадигмаси намунаси сифатида Ўзбекнефтегаз қудуқларни қанча кўп бурғулагани сари газ ишлаб чиқариш шунча камаймоқда. UzAutoMotors автомашина ишлаб чиқаришни кўпайтиргани сайин соф фойдаси қисқариб бормоқда. Буни UzAutoMotorsнинг 9 ойлик молиявий натижаларидан кўриш мумкин. Айрим эътиборли ва саволли жиҳатлар. Маҳсулот сотишдан соф тушум 15%га ошиб 19,9 трлн.сўмга етган. Аввалроқ автомашиналар ишлаб чиқариш хажми ушбу даврда 16%га оширилгани эълон қилинганди. Айни пайтда сотилган маҳсулот таннархи қарийб 26%га ошган ва 16,5 трлн.сўмни ташки этган. Мана бу саволли ва жиддий масала. Албатта монополист ҳеч қачон ўз ихтиёри билан харажатларини қисқартириш ва таннархни арзонлаштириш йўлидан юрмаслиги аниқ. Монополист амалда фақат харажатларни кўпайтиришдангина манфаатдор. Яна ўша гапни қайтарамиз: агар компаниянинг монопол ҳуқуқи сақлаб қолинадиган бўлса, откат ва қимматлаштирувчи схемаларни камайтириш учун унинг барча ички ва айниқса ташқи контрагентлари билан шартномалари тўлиқ инвентаризация қилиниши ва очиқланиши зарур. Компаниянинг сотиш билан боғлиқ харажатлари ўтган йилнинг шу даври билан солиштирганда 3 баробарга ортган ва 430,8 млрд.сўмга етган. Эътиборлиси, компания фоиз кўринишидаги даромадларини 3,3 баробар ёки 82,4 млрд.сўмгача оширган. Монополист ўтган йили 374 млрд.сўм фойда солиғи амалга оширган бўлса, бу йил 105 млрд.сўм камроқ, 269 млрд.сўм фойда солиғи тўлаган. Қайд этилган соф фойда 2,3 трлн.сўмдан 1,2 трлн.сўмгача камайган. АҚШ, Хитой, Таиланд ва Польшадаги заводлардан импорт қилиб UzAutoMotors ёрлиғи билан сотилаётган Trailblazer, Equinox, Tahoe, Traverseларнинг фойдадаги улушини қўшимча маълумотларсиз, компаниянинг эълон қилган молиявий натижалари орқали аниқлаш имконсиз эканини таъкидлаш лозим.