​"Бизда умуман ётоқхоналар сотилиш ҳолатлари йўқ", дея ваъз ўқиган ўрвазир нима дейди? Бир ҳафта аввал ўтказилган матбуот анжуманида Олий таълим, фан ва инновациялар вазирининг биринчи ўринбосари Сардор Ражабов талабалар турар жойлари оммавий сотилаётгани ҳақида тарқалган хабарлар асоссиз эканини айтиб, ётоқхоналар етмаётган ҳолатда, талабалар турар жойлари сотилишини ақлга сиғмайдиган ҳолат дея баҳолаганди. Вазирга ўша куни журналистлар талаблалар учун мўлжалланган ётоқхоналарнинг оммавий сотилиши бутун бошли хусусийлаштириш дастурларига қўшиб юборилганини айтишганми ё йўқ, билмайман (балки ўрвазир ҳужжатларни ўқимагандир). Нима бўлгандаям, Муқумий кўчасида 1 гектар майдонда жойлашган машҳур талабалар ётоқхоналари комплекси 272,3 млрд.сўмлик бошланғич нархда яна сотувга қўйилган. Белгиланган шартларга кўра, ғолиб ер участкасида нодавлат таълим муассасаси ташкил қилиш ва фаолият турини сақлаши керак бўлади. Албатта, аллақачон тарқатиб, тугатилиши керак бўлган вазирлик вакиллари чиқиб яна тўқилган қўшиқни такрорлаши ҳам мумкин, масалан — Низомий педуниверститети Янги Тошкентга кўчмоқда, унга эски Тошкентда ётоқхона керак бўлмайди, қабилида. Лекин эски Тошкентда ўнлаб давлат университетлари борки, уларга ётоқхоналар катастрофик даражада етмайди (айтайлик, сотилаётган ётоқхоналарнинг шундоқ биқинидаги Тўқимачилик ва енгил саноат институтига, Иқтисодиёт университетига). Шу ўринда, Беҳзод Ҳошимовнинг истеҳзоси ҳам ўринли. Ўзбек чиновникларининг битта қўли хусусий университетларга лицензия беришни оғзаки директива билан тўхтатиб қўйган, иккинчи қўли эса давлат университетининг ётоқхона инфратузилмасини хусусий университетлар ташкил қилиш учун сотмоқчи.